Çfarë ndryshon në ligjin për tregtarët dhe shoqëritë tregtare

Pas nenit 13 shtohen nenet 13/1, 13/2 dhe 13/3 këtë me përmbajtje:

“Neni 13/1 Miratimi nga këshilli i administrimit ose këshilli mbikëqyrës për shoqëritë e listuara

1. Transaksioni i kryer ndërmjet shoqërisë së listuar dhe palës së lidhur, sipas pikave 1 dhe 5, të nenit 13 të këtij ligji, vlera e të cilit, marrë më vete ose së bashku me transaksione të tjera të kryera me të njëjtën palë gjatë të njëjtit vit financiar, e kalon kufirin prej 1.5 për qind të totalit të aseteve të shoqërisë, që rezultojnë nga pasqyrat e fundit financiare të miratuara, kërkon miratimin paraprak të këshillit të administrimit ose mbikëqyrës ose të një komiteti të caktuar, në përputhje me pikën 5, të nenit 161 të këtij ligji.

2. Në shoqëritë aksionare të listuara, pasi këshilli i administrimit ose mbikëqyrës i shoqërisë ka dhënë miratimin e një veprimi, sipas pikës 1 të këtij neni, duhet që pa vonesë, por në çdo rast brenda 72 orëve t’i njoftojë asamblesë së përgjithshme aktin e miratimit të këtij veprimi së bashku me kushtet e veprimit, si dhe natyrën e objektin e interesit të personave të përfshirë. Brenda 6 muajve nga data e kryerjes së njoftimit për dhënien e autorizimit, asambleja e përgjithshme mund t’i kërkojë gjykatës të shpallë veprimin juridik, të miratuar si të pavlefshëm, nëse miratimi është dhënë në shkelje të rëndë të ligjit apo të statutit.

3. Anëtarët e këshillit të administrimit ose mbikëqyrës, që janë të përfshirë në transaksion si palë të lidhura, ose për të cilët ekziston dyshim për konflikt interesi për shkak të marrëdhënieve të tyre me palën e lidhur, sipas kuptimit të pikës 5, të nenit 13 të këtij ligji, përjashtohen nga ushtrimi i së drejtës së votës në marrjen e vendimit, sipas pikës 1 të këtij neni. I njëjti parashikim zbatohet edhe për aksionarin, i cili nuk mund të ushtrojë të drejtën e votës dhe aksionet e tij nuk llogariten në kuorum, në kushtet e pikës 2 të këtij neni.

4. Në rast se shoqëria është një shoqëri mëmë, sipas kuptimit të pikave 1 dhe 2, të nenit 207 të këtij ligji, atëherë si referencë për vlerësimin e transaksionit, sipas pikave 1 dhe 2 të këtij neni, do të jetë totali i aseteve të grupit.

Neni 13/2 Detyrimi për publikim

1. Shoqëria e listuar, përveç detyrimit të përcaktuar në pikën 7, të neni 13 të këtij ligji, është e detyruar, gjithashtu, të publikojë menjëherë të dhënat për ato transaksione me palë të lidhura, që kërkojnë miratim në përputhje me pikën 1, të nenit 13/1 të këtij ligji. Kur detyrimi për të marrë miratim sipas pikës 1, të nenit 13/1 të këtij ligji, lind si rezultat i disa transaksioneve që merren së bashku, edhe këto transaksione duhet të publikohen.

2. Publikimi duhet të përfshijë të gjithë informacionin thelbësor që nevojitet për të vlerësuar nëse transaksioni është i përshtatshëm nga këndvështrimi i shoqërisë dhe i aksionarëve, që nuk janë palë të lidhura. Ky informacion duhet të përfshijë, së paku, natyrën e marrëdhënies me palët e lidhura, emrat e palëve të lidhura, datën dhe vlerën e transaksionit. Informacioni duhet të jetë publik në faqen zyrtare të internetit të shoqërisë për një periudhë jo më të shkurtër se 5 vjet.

3. Nëse transaksioni me palë të lidhura përbën tregtim, të bazuar në informacionin e privilegjuar, sipas kuptimit të ligjit që rregullon tregjet e kapitalit, atëherë të dhënat e kërkuara sipas pikës 2 të këtij neni, duhet të përfshihen në publikimin që bëhet sipas kërkesave të ligjit që rregullon tregjet e kapitalit.

4. Nëse shoqëria është shoqëri mëmë, në kuptimin e nenit 207 të këtij ligji, atëherë fjalia e parë, e pikës 1, si dhe pikat 2 dhe 3 të këtij neni zbatohen në mënyrë të ngjashme edhe për një transaksion me palë të lidhura që realizohet nga një shoqëri e kontrolluar me palë të lidhura të shoqërisë mëmë, nëse ky transaksion, po të ishte realizuar nga vet shoqëria mëmë, do të kishte kërkuar miratimin e parashikuar në pikën 1, të nenit 13/1 të këtij ligji.

Neni 13/3 Kushtet për skualifikimin e anëtarëve të këshillit dhe administratorëve

1. Personat që janë dënuar me vendim të formës së prerë për kryerjen e veprave penale kundër pasurisë dhe në sferën ekonomike, të parashikuara në Kodin Penal, për një afat deri në 5 vjet nga data e këtij dënimi, nuk mund të mbajnë funksionet e përfaqësuesit ligjor të një shoqërie tregtare, nuk mund të jenë anëtarë të këshillit të administrimit apo të këshillit mbikëqyrës dhe as përfaqësues të aksionarëve në asamblenë e përgjithshme.

2. Nuk mund të jenë përfaqësues ligjorë të një shoqërie tregtare, anëtarë të këshillit të administrimit, të këshillit mbikëqyrës apo përfaqësues të aksionarëve në asamblenë e përgjithshme personat, që:

a) janë dënuar për një vepër penale në një shtet tjetër, e cila për nga natyra, baza ligjore dhe data e hyrjes në fuqi e dënimit/masës së sigurisë korrespondon me elemente penale, të përmendura në pikën 1 të këtij neni;

b) ndaj të cilëve është vendosur një masë sigurie e ndalimit për ushtrimin e një profesioni, që mbulohet plotësisht ose pjesërisht nga veprimtaria tregtare e shoqërisë për kohëzgjatjen e ndalimit;

c) janë ndaluar në një shtet tjetër të ushtrojnë një profesion, që mbulohet plotësisht ose pjesërisht nga veprimtaria tregtare e shoqërisë për kohëzgjatjen e ndalimit.

3. Emërimi si administrator apo anëtarësia në këshillin e administrimit ose këshillin mbikëqyrës pushon me ligj, nëse pas marrjes së vendimit për emërimin, lindin rrethana që sipas ligjit dhe këtij neni do ta kishin penguar emërimin nëse do të kishin ekzistuar në momentin e marrjes së vendimit. Administratori apo anëtari i këshillit të administrimit ose këshillit mbikëqyrës, emërimi i të cilit ka përfunduar për shkak të dhënies së një vendimi gjyqësor të formës së prerë ose për shkak të vendosjes së një mase, që kufizon disponimin e pasurisë së tij, është i detyruar të njoftojë pa vonesë shoqërinë jo më vonë se 3 ditë. Në këtë rast, aksionarët, sipas kompetencave përkatëse në statut, dorëzojnë jo më vonë se 3 ditë vendimin për shkarkimin e administratorit/anëtarit të këshillit të administrimit apo të këshillit mbikëqyrës.

4. Qendra Kombëtare e Biznesit krijon, publikon dhe administron modulin e të dhënave për personat që nuk mund të jenë administratorë dhe/ose anëtarë të këshillit të administrimit apo të këshillit mbikëqyrës, sipas këtij neni, pjesë e regjistrit tregtar.

5. Për regjistrimin e administratorit ose anëtarit të organit drejtues/mbikëqyrës në Qendrën Kombëtare të Biznesit, shoqëria duhet të paraqesë elektronikisht nëpërmjet portalit “e-Albania” dokumentacionin zyrtar, që vërteton se personi i emëruar:

a) nuk ka vendim penal të formës së prerë për vepra penale, që pengojnë ushtrimin e funksioneve drejtuese, sipas legjislacionit shqiptar, apo vendim të ngjashëm penal të një shteti tjetër;

b) nuk është nën masë sigurie ose ndalim për ushtrimin e profesionit, që lidhet me veprimtarinë e shoqërisë.

6. Shoqëria është përgjegjëse për depozitimin e deklaratës së përmendur në pikën 1 të këtij neni në Qendrën Kombëtare të Biznesit në momentin e kryerjes së aplikimit për regjistrim nëpërmjet portalit “e-Albania”.

7. Të dhënat personale të mbledhura dhe të depozituara për qëllime të këtij neni, për administratorët apo anëtarët e organeve drejtuese dhe mbikëqyrëse përpunohen, në përputhje me legjislacionin shqiptar në fuqi për mbrojtjen e të dhënave personale, dhe përdoren vetëm, për:

a) vlerësimin nga Qendra Kombëtare e Biznesit ose autoritetet e tjera të përcaktuara me ligj të kushteve të ndalimit të personave për të qenë anëtarë të organeve drejtuese ose mbikëqyrëse;

b) parandalimin e sjelljeve mashtruese ose abuzive dhe garantimit të mbrojtjes së palëve të treta, që bashkëveprojnë me shoqëritë tregtare ose degët e tyre.

8. Qendra Kombëtare e Biznesit dhe çdo autoritet tjetër, i autorizuar me ligj për administrimin e procedurave elektronike të regjistrimit, nuk mund të ruajë të dhëna personale të mbledhura për qëllimet e këtij neni për më shumë kohë sesa të dhënat që ruhen për formimin e një shoqërie, regjistrimin e një dege ose depozitimin e akteve të tjera statutore. Pas përfundimit të periudhës së lejuar të ruajtjes, të dhënat personale duhet të fshihen menjëherë dhe pa procedurë shtesë.”.

Pas nenit 119 shtohen nenet 119/1, 119/2, 119/3, 119/4, 119/5 dhe 119/6 me këtë përmbajtje:

“Neni 119/1 Përcjellja e informacionit për ngjarjet korporative

1. Shoqëritë e listuara duhet të përcjellin informacionin, në lidhje me ngjarjet korporative, sipas përkufizimit të pikës 6, të nenit 1 të këtij ligji, të cilat nuk u komunikohen drejtpërdrejt ose në ndonjë mënyrë tjetër aksionarëve. Ky informacion përcillet duke iu dërguar subjekteve të regjistruar në regjistrin e aksioneve ose duke u përcjellë te ndërmjetësit që mbajnë llogaritë e aksioneve të shoqërisë. Nëse informacioni që duhet përcjellë është publikuar në faqen e internetit të shoqërisë, njoftimi duhet të tregojë se ku mund të gjendet ky informacion në këtë faqe. Neni 137 i këtij ligji zbatohet përkatësisht për njoftimin për thirrjen e asamblesë së përgjithshme.

2. Informacioni për ngjarjet korporative mund të përcillet edhe nga palë të treta të caktuara nga shoqëria, sipas udhëzimeve të saj. Informacioni duhet të përcillet në mënyrë elektronike te ndërmjetësit.

3. Ndërmjetësi në zinxhir është i detyruar të përcjellë pa vonesë te ndërmjetësi pasues informacionin sipas pikës 1 të këtij neni, të cilin e ka marrë nga një ndërmjetës tjetër pararendës nga shoqëria ose nga një palë e tretë e caktuar nga shoqëria. Ky detyrim zbatohet në mënyrë të njëjtë edhe për informacionin që i përket një shoqërie të listuar, zyra qendrore e së cilës ndodhet në një shtet anëtar të Bashkimit Evropian. Në mënyrë të ngjashme zbatohet edhe pika 2 e këtij neni.

Neni 119/2 Përcjellja e informacionit nga ndërmjetësit tek aksionarët

1. Ndërmjetësi i fundit është i detyruar të përcjellë pa vonesë tek aksionari informacionin e marrë në përputhje me pikën 1, të nenit 119/1 të këtij ligji.

2. Ky detyrim zbatohet njësoj edhe për informacionin që i përket shoqërisë së listuar, selia e së cilës ndodhet jashtë territorit të Republikës së Shqipërisë, por në një shtet anëtar të Bashkimit Evropian.

Neni 119/3 Përcjellja e informacionit nga ndërmjetësit te shoqëria, konfirmimi i pronësisë për aksionet

1. Ndërmjetësi i fundit është i detyruar ta përcjellë informacionin e marrë nga aksionari i shoqërisë në lidhje me ushtrimin e të drejtave të tij si aksionar ose drejtpërdrejt te shoqëria ose te një ndërmjetës tjetër në zinxhir, nëse ka të tillë. Ndërmjetësit e tjerë duhet ta përcjellin informacionin e marrë ose drejtpërdrejt te shoqëria apo te ndërmjetësi pasues në zinxhir, nëse ka të tillë. Fjalia parë dhe e dytë e kësaj pike zbatohen në mënyrë të ngjashme edhe për përcjelljen e udhëzimeve të dhëna nga aksionari, në lidhje me ushtrimin e të drejtave që rrjedhin nga aksionet e regjistruara të një shoqërie të listuar, drejtuar ndërmjetësit të regjistruar në regjistrin e aksioneve.

2. Aksionari ka të drejtë të japë udhëzime për mënyrën e përcjelljes së informacionit, në përputhje me pikën 1 të këtij neni. Fjalia e parë e pikës 2, të nenit 119/1 të këtij ligji zbatohet edhe në këtë rast.

3. Pikat 1 dhe 2 të këtij neni zbatohen, gjithashtu, edhe për informacionin që i përket një shoqërie të listuar me seli në një shtet anëtar të Bashkimit Evropian.

4. Ndërmjetësi i fundit, me kërkesë të aksionarit, është i detyruar pa vonesë t’i lëshojë një konfirmim me shkrim për aksionet e zotëruara prej tij, sipas regjistrave të mbajtur nga ndërmjetësi, me qëllim që aksionari të mund të ushtrojë të drejtat e tij në asamblenë e përgjithshme ose ta përcjellë këtë provë te shoqëria, në përputhje me pikën 1 të këtij neni.

Neni 119/4 E drejta e shoqërisë për marrjen e informacionit nga ndërmjetësit

1. Shoqëria e listuar shqiptare me aksione të pranuara për tregtim në tregjet e rregulluara shqiptare apo tregjet e rregulluara të shteteve anëtare të Bashkimit Evropian ka të drejtë të kërkojë nga ndërmjetësi, që vepron si depozitar i aksioneve të saj, përcjelljen e informacionit, në lidhje me identitetin e aksionarëve dhe ndërmjetësin pasardhës në zinxhir. Kërkesa për identifikim mund të bëhet edhe nëpërmjet një pale të tretë të caktuar nga shoqëria e listuar.

2. Çdo ndërmjetës është i detyruar ta përcjellë kërkesën e shoqërisë për informacion te ndërmjetësi pasardhës, pa vonesë dhe jo më vonë se përfundimi i orarit zyrtar të së njëjtës ditë nga marrja e kërkesës.

3. Ndërmjetësi i fundit është i detyruar ta përcjellë informacionin te shoqëria apo një palë e tretë e caktuar prej saj për të përmbushur kërkesën e shoqërisë për informacion. Ky detyrim nuk zbatohet nëse shoqëria kërkon që përcjellja të kryhet nga një ndërmjetës tjetër në zinxhir. Në këtë rast, ndërmjetësit janë të detyruar ta përcjellin informacionin pa vonesë te ndërmjetësi i caktuar ose ndërmjetësi pasardhës, sipas kërkesës së shoqërisë. Ndërmjetësi, të cilit i kërkohet përcjellja e informacionit nga shoqëria, është i detyruar t’ia përcjellë informacionin shoqërisë pa vonesë.

4. Pikat e mësipërme të këtij neni zbatohen gjithashtu edhe për kërkesat për informacion të paraqitura nga një shoqëri e listuar me zyrë qendrore në një shtet anëtar të Bashkimit Evropian. Parashikimi i fjalisë së parë të pikës 2, të nenit 119/1 të ligjit zbatohet në mënyrë të ngjashme për pikat 1 deri në 4, të këtij neni.

Neni 119/5 Përpunimi dhe korrigjimi i të dhënave personale të aksionarëve

1. Shoqëritë e listuara dhe ndërmjetësit mund të përpunojnë të dhënat personale të aksionarëve, për qëllim të identifikimit, komunikimit me aksionarët, shoqëritë dhe ndërmjetësit, ushtrimit të të drejtave të aksionarëve, mbajtjes së regjistrit të aksioneve, si dhe për bashkëpunimin me aksionarët.

2. Nëse shoqëria ose ndërmjetësi merr dijeni se një person nuk është më aksionar i shoqërisë, ata mund të ruajnë të dhënat personale të këtij personi për një periudhë jo më të gjatë se 12 muaj, përveç rasteve kur ligji parashikon ndryshe. Shoqëria mund t’i ruajë të dhënat për një periudhë më të gjatë, nëse kjo është e nevojshme për qëllime të procedurave ligjore.

3. Publikimi i informacionit për identitetin e aksionarëve ndaj shoqërisë ose ndërmjetësve, që janë të detyruar ta përcjellin këtë informacion në përputhje me nenin 119/4 të këtij ligji, nuk përbën shkelje të ndonjë detyrimi kontraktor apo ligjor nga ana e ndërmjetësve.

4. Çdo person që është identifikuar në mënyrë të paplotë ose të pasaktë si aksionar ka të drejtë të kërkojë nga shoqëria dhe nga ndërmjetësi që ka dhënë informacionin përkatës korrigjimin pa vonesë të të dhënave.

Neni 119/6 Kostot për shërbimet e ndërmjetësve

1. Shoqëria mbulon kostot që i lindin ndërmjetësit për përpjekjet dhe shpenzimet që janë të domosdoshme, në përputhje me nenet 119/1 deri në 119/4 të këtij ligji, për aq sa këto përpjekje dhe shpenzime bazohen në metoda që pasqyrojnë përparimet teknologjike.

2. Rregulli i mësipërm nuk zbatohet për kostot e ndërmjetësit të fundit për përpjekjet dhe shpenzimet e nevojshme për përcjelljen e informacionit tek aksionari në mënyrë joelektronike, sipas pikës 1, të nenit 119/2, si dhe për kostot që i lindin shoqërisë që ka emetuar aksione të regjistruara për përpjekjet dhe shpenzimet e nevojshme të ndërmjetësve për transmetimin dhe përcjelljen e informacionit te aksionari nga ana e ndërmjetësit, të regjistruar në regjistrin e aksioneve, sipas pikës 1, të nenit 137 të këtij ligji, dhe detyrimeve të neneve 119/1 dhe 119/2 të këtij ligji.

3. Ndërmjetësit janë të detyruar të publikojnë tarifat që zbatojnë për secilin shërbim të ofruar, në përputhje me nenet 119/1 deri në nenin 119/5 të këtij ligji. Shpallja e tarifave duhet të bëhet veçmas, si për shoqërinë, ashtu edhe për aksionarët përkatës, të cilëve ndërmjetësit u ofrojnë shërbimet. Dallimet në tarifa për ushtrimin e të drejtave në territorin e Republikës së Shqipërisë dhe në raste ndërkufitare lejohen vetëm nëse janë të justifikuara dhe përputhen me diferencat reale të kostove që lidhen me ofrimin e shërbimit.”.

Pas nenit 122 shtohen nenet 122/1, 122/2, 122/3 dhe122/4 me këtë përmbajtje:

“Neni 122/1 Rregulla të posaçme për investitorët institucional dhe këshilltarët për çështjet e votimit

1. Parashikimet e neneve 122/1 deri 122/3 të këtij ligji zbatohen për investitorët institucionalë, pavarësisht nëse ata investojnë drejtpërdrejt apo nëpërmjet një administruesi të aktiveve, si dhe për administruesit e aktiveve, që investojnë në aksione të shoqërive të listuara, të cilat janë të pranuara për tregtim në një treg të rregulluar në Republikën e Shqipërisë ose në një shtet anëtar të Bashkimit Evropian. Këto dispozita nuk cenojnë dispozitat e përcaktuara në ligjet me karakter sektorial, që rregullon veprimtarinë specifike të subjekteve të lartpërmendura.

2. Parashikimi i nenit 122/4 të këtij ligji zbatohet për këshilltarët për çështjet e votimit, që:

a) kanë selinë e regjistruar apo zyrën qendrore në Republikën e Shqipërisë, apo në një shtet anëtar të Bashkimit Evropian;

b) kanë një degë në territorin e Republikës së Shqipërisë, edhe nëse nuk kanë selinë e regjistruar ose zyrën qendrore në një shtet anëtar të Bashkimit Evropian, por ofrojnë shërbime ndaj aksionarëve lidhur me aksionet e shoqërive, që kanë zyrën qendrore në Republikën e Shqipërisë apo në një shtet anëtar, si dhe aksionet e të cilave janë të pranuara për tregtim në një treg të rregulluar me vendndodhje apo funksional në Republikën e Shqipërisë, ose në një shtet anëtar të Bashkimi Evropian.

Neni 122/2 Politika e angazhimit, raporti i angazhimit dhe sjellja në votim

1. Investitorët institucionalë dhe administruesit e aktiveve janë të detyruar të bëjnë publike një politikë angazhimi në të cilën përshkruajnë mënyrën e angazhimit të tyre në shoqëritë ku investojnë, shoqëritë, objekt investimi, duke përfshirë veçanërisht:

a) mënyrën e ushtrimit të të drejtave të aksionarëve, veçanërisht në kontekstin e strategjisë së tyre të investimit;

b) mënyrën e monitorimit të shoqërive, objekt investimi, në çështje të rëndësishme, si raportimi financiar dhe jofinanciar, risku, struktura e kapitalit, ndikimi mjedisor dhe social;

c) mënyrën e shkëmbimit të qëndrimeve me organet drejtuese të shoqërive dhe me grupet e interesit;

ç) mënyrën e bashkëpunimit me aksionarë të tjerë;

d) mënyrën e administrimit të konfliktit aktual dhe potencial të interesit.

2. Investitorët institucionalë dhe administruesit e aktiveve janë të detyruar të bëjnë publike një herë në vit mënyrën e zbatimit të politikës së angazhimit. Raporti duhet të përfshijë një përshkrim të përgjithshëm të sjelljes së tyre në votimet në asamblenë e përgjithshme një shpjegim të votimeve më të rëndësishme, si dhe përdorimin e shërbimeve të këshilltarëve për çështjet e votimit.

3. Investitorët institucionalë dhe administruesit e aktiveve janë të detyruar të bëjnë publike sjelljen e tyre në votim, përveç rasteve kur votimi është i parëndësishëm, për shkak të objektit të çështjes së votuar ose për shkak të përqindjes së zotërimit të aksioneve në shoqëri.

4. Nëse investitorët institucionalë dhe administruesit e aktiveve nuk përmbushin një ose disa nga kërkesat e përcaktuara në pikat 1 deri në 3 të këtij neni ose nuk i përmbushin plotësisht ato duhet të japin shpjegime për arsyet përkatëse.

5. Informacioni i kërkuar sipas pikave 1 deri në 4 të këtij neni duhet të jetë publikisht i disponueshëm për një periudhë minimale prej 3 vjetësh në faqen zyrtare të internetit të investitorëve institucionalë dhe të administruesve të aktiveve dhe të përditësohet të paktën një herë në vit. Përjashtimisht, investitorët institucionalë mund të referojnë në faqen e internetit të administruesit të aktiveve ose në një faqe tjetër të aksesueshme dhe pa pagesë nëse informacioni i kërkuar, sipas pikave 1 deri në 4 të këtij neni, është i disponueshëm aty.

Neni 122/3 Detyrimet e investitorëve institucionalë dhe administruesve të aktiveve për publikimin e informacionit

1. Investitorët institucionalë duhet të publikojnë mënyrën sesi elementet kryesore të strategjisë së tyre të investimit në aksione janë në përputhje me profilin dhe afatin kohor të detyrimeve të tyre, në veçanti të detyrimeve afatgjata, si dhe si kontribuojnë ato në performancën afatmesme dhe afatgjatë të aktiveve të tyre.

2. Kur një administrues aktivesh investon në emër të një investitori institucional, ky i fundit duhet të publikojë informacion për marrëveshjen e tij me administruesin e aktiveve në të cilën shpjegohet se si administruesi i aktiveve përputh strategjinë dhe vendimet e investimit me profilin dhe afatin kohor të detyrimeve të investitorit institucional, në veçanti detyrimet afatgjata. Publikimi përfshin veçanërisht informacion për:

a) mënyrën sesi kjo marrëveshje nxit administruesin e aktiveve të marrë vendime investimi mbi bazën e vlerësimeve për performancën financiare dhe jofinanciare afatmesme dhe afatgjatë të shoqërisë, ku investohet dhe angazhohet me këto shoqëri për të përmirësuar performancën e tyre në afat të mesëm dhe afatgjatë;

b) mënyrën sesi metoda dhe afati kohor i vlerësimit të performancës së administruesit të aktiveve dhe shpërblimi për shërbimet e administrimit të aktiveve janë në përputhje me profilin dhe kohëzgjatjen e detyrimeve të investitorit institucional, në veçanti detyrimeve afatgjata, dhe marrin në konsideratë performancën absolute afatgjatë;

c) mënyrën sesi investitori institucional monitoron kostot e qarkullimit të portofolit të kryera nga administruesi i aktiveve dhe sesi ai përcakton dhe monitoron një nivel të synuar të qarkullimit të portofolit ose një interval qarkullimi;

ç) kohëzgjatjen e marrëveshjes me administruesin e aseteve. Në rast se nuk ekziston një marrëveshje për ndonjë nga pikat e mësipërme, investitori institucional duhet të japë shpjegime për arsyet e mungesës së saj.

3. Investitorët institucionalë duhet të bëjnë të disponueshëm për publikun informacionin e parashikuar në pikat më sipër në faqen e tyre zyrtare në internet, për një periudhë jo më të shkurtër se 3 vjet, duke e përditësuar atë së paku një herë në vit. Ky publikim mund të bëhet edhe nga administruesi i aktiveve në faqen e tij zyrtare ose në një faqe tjetër të aksesueshme publikisht. Në këtë rast, mjafton të njoftohet adresa e faqes ku mund të gjendet informacioni.

4. Administruesit e aktiveve, të cilët kanë lidhur një marrëveshje, siç përcaktohet në pikën 2 të këtij neni, duhet të raportojnë çdo vit për investitorët institucionalë për mënyrën sesi strategjia e tyre e investimit dhe zbatimi i saj përputhen me këtë marrëveshje dhe si kontribuojnë ato në performancën afatmesme dhe afatgjatë të aktiveve. Publikimi i këtij raporti, në përputhje me fjalinë e dytë, të pikës 3 të këtij neni, mund të zëvendësojë raportin drejtuar investitorit institucional. Raporti duhet të përfshijë informacion për:

a) rreziqet kryesore afatmesme dhe afatgjata;

b) përbërjen e portofolit, qarkullimin e portofolit dhe kostot e këtij qarkullimi;

c) mënyrën sesi performanca afatmesme dhe afatgjatë e shoqërisë u mor parasysh në vendimet e investimit;

ç) përdorimin e këshilltarëve për çështjet e votimit;

d) politikën për huadhënien e titujve dhe mënyrën e trajtimit të konflikteve të interesit në kuadër të angazhimit me shoqëritë, veçanërisht përmes ushtrimit të të drejtave të aksionarëve.

Neni 122/4 Detyrimi për transparencë i këshilltarëve për çështjet e votimit

1. Këshilltari për çështjet e votimit është i detyruar të deklarojë çdo vit nëse ka zbatuar dhe vijon të zbatojë kërkesat e një kodi sjelljeje ose të deklarojë nga cilat kërkesa të këtij kodi është shmangur ose po shmanget dhe cilat masa alternative ka ndërmarrë në vend të tyre. Nëse këshilltari për çështjet e votimit nuk zbaton asnjë kod sjelljeje, ai duhet të tregojë arsyet e moszbatimit.

2. Këshilltarët për çështjet e votimit janë të detyruar të publikojnë çdo vit informacion, për:

a) tiparet kryesore të metodologjive dhe modeleve që zbatojnë, si dhe burimet kryesore të informacionit që përdorin;

b) procedurat e krijuara për të siguruar cilësinë e kërkimit, këshillave dhe rekomandimeve për votimin dhe për të parandaluar apo për të menaxhuar konfliktet e mundshme të interesit;

c) kualifikimet e personelit të përfshirë në ofrimin e këshillave për përfaqësim në votim;

ç) mënyrën sesi merren në konsideratë kushtet e tregut kombëtar, si dhe kushtet ligjore, rregullatore dhe ato të veçanta për shoqërinë;

d) tiparet kryesore të politikave të votimit që aplikojnë për secilin treg të veçantë;

dh) mënyrën dhe shpeshtësinë me të cilën zhvillohet dialog me shoqëritë e prekura dhe palët e interesuara të tyre.

3. Informacioni i mësipërm duhet të jetë në dispozicion të publikut, veçmas ose së bashku, në faqen zyrtare të internetit të këshilltarëve për çështjet e votimit, për një periudhë jo më të shkurtër se 3 vjet dhe duhet të përditësohet çdo vit.

4. Këshilltari për çështjet e votimit është i detyruar të informojë klientët e tij menjëherë për çdo konflikt interesi, si dhe për masat korrigjuese që ka ndërmarrë në lidhje me to.”.

Pas nenit 127 shtohen nenet 127/1 dhe 127/2 me këtë përmbajte:

“Neni 127/1 Përdorimi i fitimit dhe kthimi i pagesave të paautorizuara

1. Shoqëria nuk mund të kryejë shpërndarje fitimi ose pagesa të tjera në favor të aksionarëve të saj nëse sipas pasqyrave financiare të vitit të fundit pasuria neto e shoqërisë është ose bëhet më e vogël pas shpërndarjes sesa shuma e kapitalit të regjistruar së bashku me rezervat që, sipas ligjit ose statutit, nuk lejohen të shpërndahen tek aksionarët.

2. Në përllogaritjen e kapitalit të regjistruar merret në konsideratë vetëm kapitali efektivisht i paguar, duke përjashtuar pjesën e kapitalit të papaguar, që nuk pasqyrohet në aktivet e bilancit të shoqërisë.

3. Përjashtimisht, ndalimi i përcaktuar në pikën 1 të këtij neni nuk zbatohet, për:

a) pagesat e kryera në përmbushje të një detyrimi kontraktual të vlefshëm për transferimin e fitimit të shoqërisë ndaj një personi tjetër, të lidhur para krijimit të fitimit dhe në bazë të një marrëveshjeje që përcakton qartë kushtet dhe përmasat e transferimit;

b) pagesat që bëhen ndaj një aksionari të shoqërisë, kur shoqëria ka një të drejtë për të marrë një kundërshpërblim ekonomik të barasvlershëm, në këmbim të pagesës së bërë;

c) kthimin e huave ose të fondeve të dhëna nga aksionarët, të cilat kanë për qëllim zëvendësimin e kapitalit ose kanë natyrë ekonomike të ngjashme me to.

4. Aksionari që ka marrë pagesa në kundërshtim me këtë nen, me statutin e shoqërisë ose me vendimet e organeve të saj, është i detyruar t’i kthejë shoqërisë shumën e marrë. Kthimi i shumave të përfituara, në kundërshtim me këtë nen, rregullohet nga kjo dispozitë si normë e posaçme, pa cenuar zbatimin e nenit 129 të këtij ligji, për rastet që nuk lidhen me shpërndarjen e fitimit

5. Aksionari mund të mbajë shumën e marrë, vetëm nëse:

a) ka vepruar me mirëbesim; dhe

b) pagesa nuk është e nevojshme për të përmbushur detyrimet ndaj kreditorëve të shoqërisë.

6. Anëtarët e organit drejtues të shoqërisë që, me faj ose për shkak të mosushtrimit të detyrave të tyre, kanë lejuar kryerjen e pagesave të paautorizuara, janë përgjegjës në mënyrë solidare ndaj shoqërisë për dëmin e shkaktuar, përfshirë edhe për shumën që shoqëria nuk ka mundur të rikuperojë nga aksionari përkatës.

7. Dispozitat e këtij neni janë të detyrueshme dhe personat e përmendur në këtë nen nuk mund të përjashtohen plotësisht ose pjesërisht nga përgjegjësitë e tyre.

8. Kërkesat e shoqërisë për kthimin e pagesave të paautorizuara parashkruhen brenda 5 (pesë) vjetëve nga data e pagesës, përveç rasteve kur shoqëria provon se përfituesi e dinte se pagesa ishte e paautorizuar. Ky afat zbatohet vetëm për shpërndarjet e fitimit të rregulluara nga ky nen dhe nuk cenon afatin e parashikuar në nenin 129 të këtij ligji për rastet e tjera të përfitimeve të paligjshme.

Neni 127/2 Rezerva dhe raportimi për aksionet e blera dhe të zotëruara nga shoqëria

1. Në rastet kur shoqëria blen dhe zotëron aksione të veta përmes një personi tjetër, që vepron në emër të saj, është e detyruar:

a) të krijojë një rezervë të veçantë, të pashpërndashme, në pasivin e bilancit, shuma e së cilës duhet të jetë e barabartë me vlerën kontabël të të gjitha aksioneve të veta të zotëruara nga shoqëria. Kjo rezervë krijohet nga shpërndarja e fitimit dhe mbahet për sa kohë aksionet zotërohen nga shoqëria;

b) të pasqyrojë në raportin vjetor të saj:

i. arsyet që çuan në blerjen e aksioneve gjatë vitit financiar;

ii. numrin dhe vlerën nominale ose, në mungesë të saj, vlerën kontabël të aksioneve të blera e të shitura gjatë vitit financiar, si dhe përqindjen që ato përfaqësojnë ndaj kapitalit të nënshkruar;

iii. kundërshpërblimin e paguar ose të marrë për aksionet e blera ose të shitura;

iv. numrin dhe vlerën nominale ose, në mungesë të saj, vlerën kontabël të të gjitha aksioneve të zotëruara nga shoqëria në fund të vitit financiar, si dhe përqindjen që ato përfaqësojnë ndaj kapitalit të nënshkruar.

2. Rezerva e parashikuar në shkronjën “a”, të pikës 1 të këtij neni, nuk mund të përdoret për shpërndarje dividenti apo rritje kapitali dhe shërben vetëm për të garantuar mbrojtjen e kapitalit të nënshkruar në raport me kreditorët e shoqërisë.”.

Pas nenit 133 shtohet neni 133/1 me këtë përmbajtje:

“Neni 133/1 Rregulla të zbatueshme për pranimin e aksioneve të veta si garanci

1. Për qëllime të këtij ligji, kur shoqëria pranon aksionet e veta si garanci, qoftë drejtpërdrejt ose përmes një personi tjetër që vepron në emrin e vet, por për llogari të shoqërisë, trajtohet për efekt të nenit 133 të këtij ligji si blerje e aksioneve të veta.

2. Nga momenti i pranimit nga shoqëria të aksioneve të veta si garanci, mbi to zbatohen të gjitha rregullat që lidhen me blerjen e aksioneve të veta, duke përfshirë:

a) pezullimin e të drejtave që burojnë nga zotërimi i tyre, përfshirë të drejtën e votës dhe të drejtën për ndarje fitimi;

b) respektimin e kufizimeve kohore dhe procedurale për mbajtjen dhe shitjen ose anulimin e aksioneve, në përputhje me nenin 133 të këtij ligji;

c) ndalimin e kthimit të kontributeve ose kapitalit tek aksionarët përmes kësaj procedure.

3. Pranimi i aksioneve si garanci nuk mund të ketë si efekt uljen e pasurisë neto të shoqërisë nën shumën e përcaktuar si minimum i kapitalit të regjistruar, duke marrë parasysh çdo zvogëlim të mëparshëm të pasurisë neto nga blerja ose mbajtja e aksioneve të veta.”.

Pas nenit 135 shtohet neni 135/1 me këtë përmbajtje:

“Neni 135/1 Votimi për politikën e shpërblimit dhe për raportin e shpërblimit

1. Asambleja e përgjithshme e një shoqërie të listuar vendos për miratimin e politikës së shpërblimit të anëtarëve të këshillit të administrimit ose mbikëqyrës dhe administratorëve, i cili i paraqitet asamblesë nga këshilli i administrimit apo mbikëqyrës, sa herë që kjo politikë pëson ndryshime të rëndësishme, por jo më pak se çdo 4 vjet. Asambleja mund të vendosë edhe të konfirmojë politikën ekzistuese të shpërblimit.

2. Vendimi i miratimit dhe politika e shpërblimit duhet të publikohen brenda 10 ditëve në faqen zyrtare të internetit të shoqërisë dhe të mbahen të aksesueshme publikisht dhe pa pagesë për aq kohë sa politika e shpërblimit është në fuqi, por jo më pak se për 10 vjet.

3. Nëse asambleja e përgjithshme nuk e miraton politikën e shpërblimit, atëherë duhet të paraqitet për miratim një politikë shpërblimi e rishikuar, jo më vonë se në mbledhjen e radhës së asamblesë së përgjithshme. Ndërkohë, shpërblimi i administratorëve dhe këshillit të administrimit ose mbikëqyrës bëhet sipas politikave ekzistuese.

4. Asambleja e përgjithshme e një shoqërie të listuar merr vendim për miratimin e raportit të shpërblimit për vitin financiar të mëparshëm, i cili është hartuar dhe është audituar në përputhje me nenin 160/2 të këtij ligji.

5. Në shoqëritë e listuara, sipas kuptimit të ligjit për kontabilitetin dhe pasqyrat financiare, nuk është e nevojshme të miratohet një vendim sipas pikës 4 të këtij neni, nëse raporti për shpërblimet për vitin financiar të kaluar i paraqitet asamblesë së përgjithshme për diskutim si një pikë e veçantë në rendin e ditës.”.

Pas nenit 136 shtohet neni 136/1 me këtë përmbajtje:

“Neni 136/1 Mbështetja financiare

1. Shoqëria nuk mund të japë kredi, të sigurojë ose të garantojë një hua për blerjen ose nënshkrimin e aksioneve të veta nga një palë e tretë, përveçse nëse këto transaksione kryhen në kuadër të aktivitetit të zakonshëm të një banke ose institucioni financiar dhe në kushte tregu.

2. Përjashtimisht, këto transaksione lejohen vetëm nëse kryhen nën përgjegjësinë e administratorit, ose në rast të një sistemi me dy nivele të këshillit mbikëqyrës, në kushte tregu dhe me shpërblim të drejtë, dhe vetëm nëse shoqëria ka fonde për të shpërndarë të paktën të barabarta me shumën e mbështetjes financiare të dhënë.

3. Transaksionet e parashikuara në pikën 2 të këtij neni paraqiten përpara Asamblesë së Përgjithshme për miratim paraprak, e cila vendos sipas rregullave të kuorumit dhe shumicës, të parashikuara në nenin 145 të këtij ligji. Organi administrativ ose drejtues përgatit një raport me shkrim, i cili i paraqitet asamblesë së përgjithshme dhe depozitohet për publikim në regjistrin tregtar. Raporti duhet të përmbajë së paku:

a) arsyet e transaksionit;

b) interesin e shoqërisë për të hyrë në këtë transaksion;

c) kushtet e transaksionit;

ç) rreziqet që lidhen me likuiditetin dhe qëndrueshmërinë financiare të shoqërisë; dhe

d) çmimin me të cilin pala e tretë do të blejë ose do të nënshkruajë aksionet.

4. Shuma e përgjithshme e mbështetjes financiare të dhënë nuk mund të ketë si pasojë zvogëlimin e aktiveve neto të shoqërisë, nën kufijtë e përcaktuar në nenin 127 të këtij ligji, duke marrë parasysh gjithashtu çdo zvogëlim të aktiveve neto, që mund të ketë ndodhur përmes blerjes nga shoqëria ose në emër të shoqërisë të aksioneve të saj, në përputhje me nenin 133 të këtij ligji. Shoqëria duhet të përfshijë ndërmjet detyrimeve në bilanc një rezervë të papërdorshme për shpërndarje në shumën e mbështetjes financiare të dhënë gjithsej.

5. Kur mbështetja financiare jepet në përputhje me pikën 2 të këtij neni, blerja ose nënshkrimi i aksioneve nga pala e tretë duhet të kryhet me çmim të drejtë, të përcaktuar nga organi administrativ ose drejtues, sipas vlerës reale të aksioneve në treg ose kur kjo vlerë mungon, sipas një vlerësimi të arsyeshëm dhe objektiv, të kryer në përputhje me standardet e kontabilitetit dhe praktikat e zakonshme të tregut. Asambleja e përgjithshme, në momentin e miratimit të transaksionit, sipas pikës 3 të këtij neni, verifikon përputhjen e çmimit me këto kritere.

6. Mbështetja financiare e përcaktuar në këtë nen nuk lejohet të zbatohet nga bankat dhe institucionet financiare, të licencuara sipas legjislacionit të zbatueshëm për bankat në Republikën e Shqipërisë, kur ajo ka si qëllim ose efekt blerjen, nënshkrimin, financimin ose marrjen e kontrollit mbi aksionet e vet bankës ose mbi aksionet e një subjekti brenda të njëjtit grup financiar. Transaksionet e zakonshme të kreditimit dhe garancive, si dhe programet për blerjen e aksioneve nga punonjësit lejohen vetëm nëse nuk cenojnë kufijtë e aktiveve neto, sipas nenit 127 të këtij ligji, dhe nuk bien ndesh me legjislacionin bankar.”.

Pas nenit 140 shtohet neni 140/1 me këtë përmbajtje:

“Neni 140/1 Rregulla të veçanta për ushtrimin e së drejtës së votës në shoqëritë e listuara Rregullat e veçanta për ushtrimin e së drejtës së votës nga ndërmjetësit dhe shërbimet tregtare të përfaqësimit për shoqëritë e listuara përcaktohen me vendim të Bordit të Autoritetit të Mbikëqyrjes Financiare.”.

Pas nenit 160, shtohen nenet 160/1 dhe 160/2 me këtë përmbajtje:

“Neni 160/1 Politikat e shpërblimit në shoqëritë e listuara

1. Këshilli i administrimit ose mbikëqyrës i shoqërisë së listuar duhet të miratojë një politikë të qartë e të kuptueshme për shpërblimin e anëtarëve të tij. Politika e shpërblimit duhet të përmbajë, së paku, detaje lidhur me çështjet e mëposhtme, përbërësit e të cilave përfshihen vetëm nëse janë pjesë reale e politikës:

a) përcaktimi i shpërblimit maksimal për anëtarët e këshillit;

b) kontributi që shpërblimi pritet të japë në mbështetje të strategjisë së biznesit dhe zhvillimit afatgjatë dhe të qëndrueshëm të shoqërisë;

c) të gjithë përbërësit fiks dhe variabël të shpërblimit dhe raporti i tyre përkatës në shpërblimin total;

ç) të gjitha kriteret financiare dhe jofinanciare për dhënien e përbërësve të shpërblimit variabël, duke përfshirë:

i. një shpjegim se si këto kritere do të kontribuojnë në përmbushjen e objektivave të përcaktuar në shkronjën “b” të kësaj pike; dhe

ii. një përshkrim të metodave të përdorura për të vlerësuar nëse kriteret e performancës janë përmbushur;

d) periudhat e shtyrjes së pagesës së përbërësve të shpërblimit;

dh) mjetet në dispozicion të shoqërisë për të kërkuar rikthimin e përbërësve të shpërblimit variabël;

e) për shpërblimet me bazë aksionesh:

i. afatet kohore;

ii. kushtet për mbajtjen e aksioneve pas përfitimit të tyre; dhe

iii. një shpjegim se si ky shpërblim do të ndihmojë në arritjen e objektivave të përcaktuar në shkronjën “b” të kësaj pike;

ë) sa u përket marrëveshjeve të lidhura me shpërblimin:

i. kohëzgjatja dhe kushtet për përfundimin e tyre, përfshirë afatet e njoftimit;

ii. çdo detyrim për pagesa kompensimi, në rast shkarkimi; dhe

iii. tiparet kryesore të skemave të pensioneve dhe daljes së parakohshme në pension;

f) një shpjegim se si janë marrë parasysh kushtet e punës dhe të shpërblimit të punonjësve të shoqërisë gjatë përcaktimit të politikës së shpërblimit, përfshirë një sqarim për grupin e punonjësve të përfshirë;

g) një paraqitje e procedurës së ndjekur për përcaktimin dhe zbatimin e politikës së shpërblimit, si dhe rishikimin e saj, duke përfshirë rolin e komiteteve përkatëse dhe masat e marra për shmangien dhe trajtimin e konfliktit të interesit;

gj) në rastin e paraqitjes së një politike të rishikuar shpërblimi, sipas pikës 3, të nenit 135/1 të këtij ligji:

i. një shpjegim i të gjitha ndryshimeve kryesore të kryera; dhe

ii. një përmbledhje e masës në të cilën janë marrë parasysh qëndrimet e aksionarëve lidhur me politikat e shpërblimit dhe raportet e shpërblimit, si dhe komentet e tyre.

2. Këshilli i administrimit ose mbikëqyrës i shoqërisë së listuar përcakton zyrtarisht shpërblimin e anëtarëve të tij, në bazë të një politike shpërblimi të paraqitur për miratim në asamblenë e përgjithshme, sipas pikës 1, të nenit 135/1 të këtij ligji. Këshilli mund të devijojë përkohësisht nga politika e shpërblimit nëse kjo është e nevojshme për interesat afatgjatë të shoqërisë, me kusht që vet politika e shpërblimit të parashikojë procedurën për këto devijime, si dhe elementet e politikës që mund të përjashtohen.

Neni 160/2 Raporti për shpërblimin

1. Administratorët dhe këshilli i administrimit ose mbikëqyrës i një shoqërie të listuar hartojnë çdo vit një raport të qartë e të kuptueshëm për shpërblimet e dhëna dhe të detyrueshme për çdo anëtar aktual apo ish-anëtar të këshillit apo administrator gjatë vitit financiar të mëparshëm, nga vet shoqëria apo nga shoqëritë që bëjnë pjesë në të njëjtin grup. Raporti i shpërblimit duhet të identifikojë personat që kanë përfituar shpërblimin dhe të përmbajë të dhënat vijuese:

a) të gjithë përbërësit fiks dhe variabël të shpërblimit, pjesa që përfaqëson secili komponent në totalin e shpërblimit, si dhe një shpjegim se si këto përputhen me politikën përkatëse të shpërblimit, si kontribuojnë në zhvillimin afatgjatë të shoqërisë dhe si janë zbatuar kriteret e performancës;

b) një paraqitje që mundëson krahasimin e ndryshimeve vjetore në shpërblim, në performancën e shoqërisë, si dhe në shpërblimin mesatar të punonjësve të shoqërisë, me kohë të plotë, gjatë 5 vjetëve të fundit financiarë, duke përfshirë edhe një shpjegim se cili grup punonjësish është marrë në konsideratë;

c) numrin e aksioneve dhe opsioneve të aksioneve të dhëna ose të ofruara dhe kushtet kryesore të ushtrimit të të drejtave, përfshirë çmimin dhe datën e ushtrimit dhe çdo ndryshim të tyre;

ç) të dhëna për përdorimin e mundësisë për të kërkuar kthimin e komponentëve variabël të shpërblimit dhe, nëse po, mënyrën e realizimit të kësaj mase;

d) informacion për çdo shmangie nga politika e shpërblimit për administratorët, përfshirë shpjegimin përse shmangia ka qenë e nevojshme dhe tregimin e elementeve specifike të politikës nga të cilat është devijuar;

dh) një shpjegim se si është marrë parasysh vendimi i asamblesë së përgjithshme, në përputhje me pikën 4, të nenit 135/1 të këtij ligji;

e) një shpjegim për respektimin e kufirit maksimal të shpërblimit të përcaktuar për administratorët.

2. Sa i përket shpërblimit për çdo administrator, raporti për shpërblimin duhet të përmbajë gjithashtu informacion për përfitime që:

a) janë ofruar nga një palë e tretë, në lidhje me veprimtarinë e tij, si pjesë e organit administrativ të shoqërisë ose janë dhënë gjatë vitit financiar;

b) janë ofruar për rastin e përfundimit të parakohshëm të veprimtarisë, si dhe çdo ndryshim të këtyre ofertave të rënë dakord gjatë vitit financiar të kaluar;

c) janë ofruar për rastin e përfundimit të rregullt të veprimtarisë, përfshirë vlerën neto aktuale dhe shumën e shpenzuar nga shoqëria ose të vendosur në rezerva për këtë qëllim gjatë vitit financiar të kaluar, si dhe çdo ndryshim të tyre, të rënë dakord gjatë po atij viti;

ç) janë ofruar për një ish-anëtar të organit administrativ, veprimtaria e të cilit ka përfunduar gjatë vitit financiar të kaluar, në lidhje me përfundimin dhe që janë dhënë gjatë të njëjtit vit.

3. Raporti për shpërblimin duhet të auditohet nga audituesi i pavarur. Audituesi i pavarur duhet të kontrollojë nëse informacioni i kërkuar, sipas pikave 1 dhe 2 të këtij neni, është përfshirë në raport. Ai duhet të hartojë një opinion lidhur me raportin e shpërblimit, i cili i bashkëlidhet raportit.

4. Raporti i shpërblimit dhe opinioni i audituesit të pavarur, sipas pikës 3 të këtij neni, duhet të jenë të aksesueshëm publikisht dhe pa pagesë në faqen zyrtare të internetit të shoqërisë, për një periudhë prej 10 vjetësh pas miratimit, sipas pikës 4, të nenit 135/1 të këtij ligji.

5. Raporti për shpërblimin nuk duhet të përmbajë të dhëna personale sensitive, sipas kuptimit të ligjit për mbrojtjen e të dhënave personale, të administratorëve apo të anëtarëve të këshillit të administrimit apo këshillit mbikëqyrës. Nuk lejohen të dhëna personale të ish-anëtarëve të këshillit apo të ish-administratorëve në raportet për shpërblimin, që hartohen pas përfundimit të 10 vjetëve nga viti financiar kur ka përfunduar veprimtaria e tyre. Në çdo rast tjetër, të dhënat personale duhet të hiqen nga raportet e shpërblimit të aksesueshme në faqen e internetit pas skadimit të afatit të përcaktuar në pikën 4 të këtij neni.

6. Raporti për shpërblimet nuk duhet të përfshijë informacionin, i cili, kur vlerësohet nëpërmjet një gjykimi të kujdesshëm biznesi, mund të shkaktojë një dëm të konsiderueshëm për shoqërinë. Nëse shoqëria përfiton nga kjo mundësi dhe arsyet për mosdhënien e informacionit pushojnë së ekzistuari pas publikimit të raportit të shpërblimeve, atëherë informacioni duhet të përfshihet në raportin e ardhshëm të shpërblimeve.”.

Pas nenit 227 shtohet neni 227/1 me këtë përmbajtje:

“Neni 227/1 Ndarja e pjesshme

1. Ndarja e pjesshme konsiston në transferimin e një ose më shumë pjesëve të aktiveve dhe pasiveve të një shoqërie në favor të një ose më shumë shoqërive ekzistuese apo të themeluara rishtazi.

2. Në ndarjen e pjesshme, shoqëria që transferon një pjesë të aktiveve dhe të pasiveve nuk shpërbëhet, por vazhdon aktivitetin e saj me aktivet dhe pasivet e mbetura. Aksionarët e shoqërisë transferuese marrin aksione ose pjesë vetëm në shoqëritë marrëse, në proporcion me aksionet ose pjesët e zotëruara në shoqërinë transferuese, sipas parashikimeve të këtij neni.”.

Pas nenit 229 shtohet neni 229/1, me këtë përmbajtje:

“Neni 229/1 Garancitë në rast shndërrimi në shoqëri aksionare me ofertë publike

1. Në çdo rast, kur një shoqëri aksionare me ofertë private shndërrohet në një shoqëri aksionare me ofertë publike dhe anasjelltas, përveç masave mbrojtëse, të parashikuara në nenet 221 deri në 224 të këtij ligji, zbatohen edhe garancitë minimale të përcaktuara në dispozitat për bashkimet dhe ndarjet që lidhen me:

a) raportin e detajuar të administratorëve, përfshirë pasojat juridike dhe ekonomike të transformimit, ndikimin për punëmarrësit dhe çdo vështirësi vlerësimi, siç parashikohet për bashkimet;

b) vlerësimin e aktiveve në përputhje me standardet e kontabilitetit dhe ligjet në fuqi;

c) mbrojtjen e kreditorëve dhe të mbajtësve të instrumenteve të kapitalit dhe borxhit, përfshirë të drejtën për të kundërshtuar transformimin dhe/ose për të kërkuar garanci;

ç) përfshirjen e ekspertëve të pavarur në rastet kur transformimi përfshin emetim të instrumenteve të rinj kapital ose titujve të borxhit për publikun.

2. Zbatimi i kësaj dispozite nuk cenon të drejtat e mbrojtura në bazë të legjislacionit për mbrojtjen e investitorëve të tregjeve të kapitalit dhe të Kodit të Punës.”.